બોલીવુડ અભિનેતા સુશાંત સિંહ રાજપૂત આપઘાત કેસમાં રોજ નવા-નવા વળાંક આવી રહ્યાં છે ત્યારે હવે સુશાંત સિંહ રાજપૂત આપઘાત કેસમાં CBIની ટીમ ફરી એક વાર તપાસ માટે વોટર સ્ટોન રિસોર્ટ પહોંચી હતી. સોમવારે ટીમે રિસોર્ટના મેનેજર અને સ્ટાફની પૂછપરછ કરી હતી. આ અગાઉ પણ ટીમે રવિવારે અહીં તપાસ કરી હતી.

મુંબઈના અંધેરીમાં સ્થિત આ તે જ રિસોર્ટ છે, જ્યાં 2 મહિના સુધી સુશાંતની સારવાર કરવામાં આવી હતી. આ સ્થાનનો ઉપયોગ સુશાંતની કાઉન્સિલિંગ માટે પણ થતો હતો. અહીં જ સ્પિરિચુઅલ (આધ્યાત્મિક ગુરૂ) હીલર મોહન સદાશિવ જોશીને પણ બોલાવવામાં આવ્યા હતા. સુશાંતના બેંક નિવેદનમાં પણ ખુલાસો થયો હતો કે સુશાંત અહીં રોકાયો હતો.

રિસોર્ટનાં મેનેજરને CBIએ પુછ્યા આ પ્રશ્નો

• સુશાંત ક્યારે રિસોર્ટમાં આવ્યો અને કેટલો સમય રહ્યો હતો?
• તે આ રિસોર્ટમાં કોની સાથે હતો અને અહીં રોકાણ દરમ્યાન શું કોઈ બહારથી આવ્યું હતું?
• આ રિસોર્ટમાં રોકાવાનું ભાડું ચેક, રોકડ અથવા કાર્ડથી કરવામાં આવ્યું હતું?
• શું સુશાંત પછી રિયા ક્યારેય આ જગ્યાની મુલાકાત લીધી હતી?
• સીબીઆઈએ સુશાંતના અહીં રોકાવાના સીસીટીવી ફૂટેજ પણ કબજે કર્યા છે?
• તપાસ એજન્સી કર્મચારીઓ પાસેથી જાણવા માંગે છે કે શું તેઓ અભિનેતાની સાથે હતા ત્યારે અભિનેતાની માનસિક સ્થિતિ અને વર્તનમાં કોઈ અસામાન્ય ફેરફાર દેખાયો હતો?

અહીં આધ્યાત્મિક ગુરૂને બે વાર મળ્યા હતા સુશાંત
થાણે સ્થિત આધ્યાત્મિક ગુરુ મોહન સદાશિવ જોશીના જણાવ્યા અનુસાર, 2019 માં, રિયા ચક્રવર્તીએ તેમને કહ્યું હતું કે સુશાંત ડિપ્રેશનમાં હતા. આ પછી, તે સતત બે દિવસ અભિનેતાને મળ્યા. વિશેષ વાત એ છે કે તેણે સુશાંત સાથે ખુદ વધારે વાત નહોતી કરી. ખાનગી મીડિયા સાથેની વાતચીતમાં મોહન સદાશિવ જોશીએ કહ્યું હતું કે સુશાંતને બે વાર તેના વોટર સ્ટોન રિસોર્ટમાં મળ્યો હતો.

જોશીએ કહ્યું, “હું તેમને 22 અને 23 નવેમ્બરના રોજ મળ્યો હતો. 22 નવેમ્બરના રોજ મેં તેમને આશીર્વાદ આપ્યા હતા. ત્યારબાદ 23 નવેમ્બરના રોજ મને રિયાનો ફોન આવ્યો અને કહ્યું કે સુશાંત ખૂબ સારા છે. તે જ દિવસે હું તેની સાથે ફરી મળી હતી. અમે ત્રણેય (સુશાંત, રિયા અને જોશી) એક સાથે લંચ લીધું હતું.”

રિયાએ ગૂગલ પર સર્ચ કરીને બોલાવ્યા
જ્યારે જોશીને પૂછવામાં આવ્યું કે તેમને રિયા દ્વારા બોલાવવામાં આવ્યા છે કે પછી તેઓ કોઈ અન્ય રીતે તેમની પાસે પહોંચ્યા છે? તેના જવાબમાં તે કહે છે, “રિયાએ મને બોલાવ્યો. હું મારી જાહેરાત કરતો નથી. ડિપ્રેશનનો ભોગ બનેલા લોકો મને ગુગલ પર શોધે છે અને પછી મારો સંપર્ક કરે છે.

રિયાએ મને કહ્યુ હતુ કે સુશાંત ડિપ્રેશનમાં છે.” જોશીના જણાવ્યા અનુસાર, “સુશાંતને મળ્યા બાદ તે ડિપ્રેશનમાં જોવા મળ્યો હતો. તેણે તેઓની સારવાર કરી અને બીજા દિવસે તેઓને કહેવામાં આવ્યું કે તેઓ 90 ટકા સ્વસ્થ થઈ ચૂક્યા છે.

કેવી રીતે હીલ કરે છે મોહન જોશી?
જોશીના કહેવા મુજબ, “તેઓ તેમના હાથ દ્વારા પીડિતની અંદર ઉર્જા મોકલે છે.” તેણે કહ્યું, “મારા હાથ ગરમ રહે છે. આ ઉર્જા માનવ શરીરની અંદર જાય છે. આ ઉર્જા તેમને સ્વસ્થ કરે છે. હું નથી કરતો.” જોશીએ વધુમાં સમજાવ્યું કે તેઓ આ કામ માટે કોઈ ફી લેતા નથી. પરંતુ જો કોઈ જાતે કંઈક આપતા હોય તો તે સ્વીકારે છે. આ માટે તેઓ કોઈ પણ પ્રકારની પૂજા પણ કરતા નથી, તેમના મતે તેઓ નાસ્તિક છે.

બાન્દ્રા પોલીસે પૂછપરછ માટે બોલાવ્યા
જોશીના જણાવ્યા મુજબ બાંદ્રા પોલીસે તેમને ફોન કરીને પૂછપરછ માટે બોલાવ્યા હતા. પરંતુ તેઓ જઈ શક્યા નહીં. તે કહે છે, “મેં તેમને કહ્યું હતું કે હું 70 વર્ષનો છું અને મારી એન્જીયોગ્રાફી થઈ છે. હું એટલે દૂર સુધી આવી શકતો નથી. મેં કરેલી બધી બાબતો રેકોર્ડ છે. હું તમને મોકલી શકું છું.”

રિસોર્ટ વિશે શું ખાસ છે?
આ 5 સ્ટાર રિસોર્ટ મુંબઇ આંતરરાષ્ટ્રીય વિમાનમથકની પાછળ સ્થિત છે. આ રિસોર્ટમાં એક દિવસનું ભાડુ આશરે 5 હજાર રૂપિયાથી લઈને 8 હજાર રૂપિયા સુધીની હોય છે. રિસોર્ટમાં સ્પા, ટેનિસ લોન પણ છે. આ ઉપરાંત અંગત ટ્રેનરની સાથે જિમ, મેડિટેશન સેન્ટર અને યોગ સેન્ટર પણ છે. એવું માનવામાં આવે છે કે કદાચ આ જ કારણ છે કે સુશાંત આટલા લાંબા સમય સુધી અહીં રહ્યો હતો.