ન્યૂ યોર્કઃ અમેરિકાના ડોકટરોએ ચેતવણી આપી છે કે કોરોનાવાઈરસને કારણે 30 થી 49 વર્ષની વયના ઘણા લોકોના અચાનક મોત થઈ રહ્યા છે. તેમાંથી, ઘણા લોકો એવા છે, જેઓ બીમાર દેખાતા નહોતા અને તેમાં કોઈ લક્ષણો નહોતા. પરંતુ અચાનક સ્ટ્રોકના કારણે લોકો મરી રહ્યા છે. ન્યૂયોર્કમાં ઘણા લોકોના મોત તેમના ઘરમાં જ થયા હતા.
વોશિંગ્ટનપોસ્ટ ડોટ કોમના અહેવાલમાં જણાવ્યા અનુસાર, મેનહટનમાં એમએસબીઆઈ હોસ્પિટલના ડોક્ટર થૉમસ ઓક્સલીએ જણાવ્યું હતું કે તેમના એક દર્દીએ કોઈ દવા લીધી નહોતી અને તેને પહેલેથી કોઈ સમસ્યા નહોતી. અન્ય લોકોની જેમ તે દર્દી પણ લોકડાઉનમાં ઘરમાં હતો. અચાનક તેને વાત કરવામાં મુશ્કેલી અનુભવાઈ.
તપાસ દરમિયાન જાણવા મળ્યું કે તે સ્ટ્રોકનો શિકાર હતો અને તેના માથામાં એક મોટું બ્લોકેજ હતું. તપાસમાં તેમને કોરોનાનો પણ ચેપ લાગ્યો હતો. દર્દીની ઉંમર માત્ર 44 વર્ષ હતી. જોકે, આવા ગંભીર સ્ટ્રોકથી પીડિત લોકોની સરેરાશ ઉંમર અત્યાર સુધીમાં 74 વર્ષ રહી છે. પરંતુ કોરોનાવાઈરસને કારણે નાની ઉંમરનાં લોકોના જીવ સ્ટ્રોકના કારણે જઈ રહ્યા છે.
ન્યુરોલોજીસ્ટ થોમસ ઓક્સલીએ કહ્યું કે જ્યારે તેણે દર્દીના માથામાંથી ગાંઠ હટાવવાની પ્રક્રિયા શરૂ કરી તો તેણે મોનિટર પર જોયું કે તે જ સમયે તેના માથામાં નવી ગાંઠો બનતી હતી. યુ.એસ.ની ઘણી હોસ્પિટલોમાં સ્ટ્રોકથી પીડાતા દર્દીઓની સંખ્યામાં વધારો થયો છે. તપાસ દરમિયાન, ઘણા લોકો કે જે સ્ટ્રોકનો ભોગ બન્યા હતા, તેઓ કોરોના પોઝિટિવ હોવાનું જણાયું હતું. ઘણા દર્દીઓને અગાઉ ચેપનાં કોઈ ચિહ્નો નહોતા.
પહેલાં એવું માનવામાં આવતું હતું કે કોરોનાને લીધે, શરીરના ફેફસાં સામાન્ય રીતે પ્રભાવિત થાય છે. પરંતુ દર્દીઓની સંખ્યા અને ઘણા બધા અભ્યાસો દર્શાવે છે કે કોરોના શરીરના લગભગ દરેક ભાગને અસર કરે છે. કોરોનાને કારણે, શરીરમાં આવા ઘણા રોગો છે, જેને ડોકટરોને સમજવામાં મુશ્કેલી અનુભવી રહ્યા છે.
અત્યાર સુધીમાં, કોરોના અને સ્ટ્રોક વિશે ખૂબ ઓછી માહિતી ઉપલબ્ધ છે. પરંતુ હવે અમેરિકાના ત્રણ મોટા મેડિકલ સેન્ટરો કોરોના દર્દીઓમાં સ્ટ્રોકના મામલાઓથી સંબંધિત ડેટા પ્રકાશિત કરવા જઈ રહ્યા છે. કુલ દર્દીઓમાં સ્ટ્રોકના શિકાર લોકોની સંખ્યા ઓછી છે, પરંતુ વાઈરસની શરીર પર શું અસર થાય છે, આ વાત ઘણી જ મહત્વપૂર્ણ છે.
સ્ટ્રોક્સ દરમિયાન અચાનક લોહીના સપ્લાય પર અસર થાય છે. ડોકટરો માટે આ પહેલેથી જ જટિલ સમસ્યા છે. આ હૃદયની સમસ્યા, કોલેસ્ટ્રોલ, દવાઓ લેવાનું, વગેરેને કારણે થઈ શકે છે. મીની સ્ટ્રોક સામાન્ય રીતે જાતે જ ઠીક થઈ જાય છે. મોટા સ્ટ્રોક્સ ઘાતક હોઈ શકે છે અને કોરોનાવાઈરસને કારણે દર્દીઓ ગંભીર સ્ટ્રોકનો સામનો કરવો પડી શકે છે.
