લોક જનશક્તિ પાર્ટી (એલજેપી) ના સ્થાપક રામ વિલાસ પાસવાન શનિવારે સાંજે પંચતત્વોમાં વિલીન થઈ ગયા. પુત્ર ચિરાગ પાસવાને તેમને મુખાગ્નિ આપી હતી. અંતિમ સંસ્કાર પટનામાં ગંગા નદી પર બનેલાં દિઘા ઘાટ પર થયા હતા. પિતાને મુખાગ્નિ આપતા પહેલાં ચિરાગ ચક્કર ખાધા પછી નીચે પડી ગયો હતો. લોકોએ તેને ઉભો કર્યો. ત્યારબાદ તેણે અંતિમ ક્રિયા પૂર્ણ કરી.

આ પહેલા પટણામાં પાસવાનના ઘરેથી અંતિમ યાત્રા કાઢવામાં આવી હતી. પુત્ર ચિરાગ પાસવાને પિતાને કાંધ આપી હતી, લોકોની આંખો ભીની થઈ ગઈ. ‘રામ વિલાસ અમર રહે’ ના નારા લગાવ્યા હતા. પાર્થિવદેહને આર્મીના વાહન પર મુકવામાં આવ્યુ હતુ.

શુક્રવારે સાંજે 7.55 વાગ્યે પાસવાનનો મૃતદેહ પટણા પહોંચ્યો હતો. મુખ્યમંત્રી નીતીશ કુમારે એરપોર્ટ પર જ રામવિલાસને શ્રદ્ધાંજલિ આપી હતી. નીતીશની આંખો ભીની હતી અને તેણે ચિરાગ પાસવાન સાથે આંખો-આંખોમાં જ વાત કરી. રામ વિલાસના પુત્ર અને એલજેપીના રાષ્ટ્રીય અધ્યક્ષ ચિરાગે ભૂતકાળમાં ઘણી વખત નીતિશ પર તીખા પ્રહાર કર્યા છે.

પટણા એરપોર્ટ પર હોબાળો મચ્યો
રામ વિલાસની પુત્રી અને જમાઈને પટના એરપોર્ટની અંદર જતા અટકાવવામાં આવ્યા હતા, ત્યાં હોબાળો મચ્યો હતો. પુત્રી આશા અને જમાઈ અનિલ કુમાર સાધુએ આરોપ લગાવ્યો કે સુરક્ષા કર્મચારી તેમને અંદર જવા દેતા નથી. આ દરમિયાન અનિલે નાયબ મુખ્યમંત્રી સુશીલ મોદીની કાર પણ રોકી હતી. સુરક્ષા જવાનોની ઘણી મહેનત બાદ અનિલ કારની આગળથી હટ્યો હતો.

મોદી, અમિત શાહ, રાજનાથ અને રાહુલ ગાંધીએ શ્રધ્ધાંજલિ આપી
શુક્રવારે પાસવાનના પાર્થિવ દેહને તેમની અંતિમ દર્શન માટે તેમના 12 જનપથ સરકારી ગૃહમાં દિલ્હી રાખવામાં આવ્યો હતો. વડા પ્રધાન નરેન્દ્ર મોદીએ ત્યાં શ્રદ્ધાંજલિ આપી હતી. મોદીની સાથે ભાજપ અધ્યક્ષ જેપી નડ્ડા અને કેન્દ્રીય પ્રધાન રવિશંકર પ્રસાદ પણ હતા. રાષ્ટ્રપતિ રામ નાથ કોવિંદ, ગૃહમંત્રી અમિત શાહ, સંરક્ષણ પ્રધાન રાજનાથ સિંહ અને કોંગ્રેસના નેતા રાહુલ ગાંધીએ પણ પાસવાનને શ્રદ્ધાંજલિ આપી હતી.

રામવિલાસની 2 વખત હાર્ટ સર્જરી થઈ
રામવિલાસ પાસવાનનું 74 વર્ષની વયે ગુરુવારે દિલ્હીમાં નિધન થયું હતું. છેલ્લા કેટલાક મહિનાઓથી તે બીમાર હતા અને 11 સપ્ટેમ્બરના રોજ તેમને હોસ્પિટલમાં દાખલ કરવામાં આવ્યા હતા. 2 ઓક્ટોબરની રાત્રે એઇમ્સમાં તેમની હાર્ટ સર્જરી થઈ હતી. આ પહેલા બાયપાસ સર્જરી પણ કરવામાં આવી હતી.

રાજકારણમાં લાલૂ-નીતિશ કરતાં પણ સીનિયર હતા
1969માં પહેલીવાર ધારાસભ્ય બનેલાં પાસવાન પોતાની સાથેના નેતાઓ લાલૂ પ્રસાદ યાદવ અને નીતીશ કુમારથી સીનિયર હતા. 1975માં જ્યારે કટોકટીની જાહેરાત થઈ હતી ત્યારે પાસવાનની ધરપકડ કરવામાં આવી હતી., તેમણે 1977માં જનતા પાર્ટીની સદસ્યતા લીધી અને હાજીપુર સંસદીય ક્ષેત્રમાંથી જીત્યા હતા. ત્યારે સૌથી મોટા માર્જીન સાથે સાથે ચુંટણી જીતવાનો રેકોર્ડ પાસવાનનાં નામે નોંધાયો હતો.

11 વખત લડ્યા , 9 વાર જીત્યા
પાસવાન 2009ની ચૂંટણીમાં હાજીપુરની બેઠક ગુમાવી બેઠા. ત્યારબાદ તેમણે NDA સાથે સંબંધ તોડીને રાજદ સાથે ગઠબંધન કર્યુ હતુ. ચૂંટણી હાર્યા પછી, તે આરજેડીની સહાયથી રાજ્યસભા પહોંચ્યા અને બાદમાં NDAનો ભાગ બન્યા. 2000માં, તેમણે તેમની લોકજનશક્તિ પાર્ટી (એલજેપી) ની રચના કરી. પાસવાનએ તેમના રાજકીય જીવનમાં 11 વખત લડ્યા અને 9 વાર જીત્યા. તેમણે 2019ની લોકસભાની ચૂંટણી લડી ન હતી, તે રાજ્યસભાના સભ્ય બન્યા હતા. હાલમાં તેઓ મોદી સરકારમાં ખાદ્ય અને ગ્રાહક બાબતોના પ્રધાન હતા.

પાસવાનના નામે ઘણી સિદ્ધિઓ છે. હાજીપુરમાં રેલ્વેની ઝોનલ ઓફિસ તેમની દેન છે. પાસવાનની પહેલ પર જ આંબેડકર જયંતી પર રાષ્ટ્રીય રજા જાહેર કરાઈ હતી. રાજકારણમાં બાબા સાહેબ, જે.પી., રાજનારાયણને તેમનો આદર્શ માનનારા પાસવાને રાજકારણમાં ક્યારેય પાછા વળીને જોયુ નથી. તેઓ મૂળ સમાજવાદી બેકગ્રાઉન્ડનાં નેતા હતા.