સામાન્ય રીતે પુરુષો દારૂ પીને ધમાલ મચાવે તેવા દૃશ્યો જોયા હશે. કોઈ સ્ત્રી દારૂ પીને જાહેરમાં તમાશો બનાવે એવા બનાવ ભાગ્યે જ સાંભળ્યા હશે. પણ આવો જ એક અજીબ કિસ્સો સામે આવ્યો છે. જેમાં એક મહિલાએ દારૂ પીને રોડ વચ્ચે ધમાલ માચવી હતી. એટલું જ નહીં રસ્તા પર સુઈ જઈ વાહનોને રોકવાનો પણ પ્રયત્ન કર્યો હતો.
આ મામલો મહારાષ્ટ્રના પુના શહેરનો છે. અહીંના સ્વારગેટના હીરાબા ચોકમાં એક મહિલાએ દારૂના નશામાં ધુત્ત થઈને રોડ વચ્ચે જોરદાર હંગામો મચાવ્યો હતો. મહિલાની આ હરકતના કારણે અંદાજે 15 મિનિટ સુધી ટ્રાફિક જામ થઈ ગયો હતો. નશામાં મહિલા રોડ પર સુઈ પણ ગઈ હતી.
મંગળવાર રાતની આ ઘટનાનો હાજર લોકોએ વીડિયો બનાવી લીધો હતો. આ અંગે પોલીસને જાણકારી આપવામાં આવી હતી. ત્યાર બાદ થોડીવારમાં પોલીસની એક ટીમ ઘટનાસ્થળે પહોંચી હતી અને મહિલાને કોઈ રીતે સમજાવી રોડના કિનારે લઈ જવામાં આવી હતી.
આ અંગેની તપાસ કરી રહેલા સ્વારગેટ પોલીસ સ્ટેશનના સીનિયર પીઆઈ બાલાસાહેબ કોપનારે જણાવ્યું હતું કે આ ઘટના મંગળવાર રાતના 10 વાગ્યાની છે. મહિલા રોડ પર સુઈને વાહનોને રોકવાનો પ્રયત્ન કરતી હતી. પોલીસ આ મહિલાને સમજાવી રહી હતી કે તે ઘટના સ્થળેથી ભાગી ગઈ હતી. અમે તેની શોધખોળ માટે એક ટીમ કામે લગાડી છે. હાલ આ મામલામાં કોઈ કેસ નોંધવામાં આવ્યો નથી. આ યુવતીના કારણે થોડીવાર રોડ પર ટ્રાફિક જામ થઈ ગયો હતો.