મુંબઈમાં ટ્રેઈની એર હોસ્ટેસ તરીકે કામ કરતી રૂપલ ઓગરેની હત્યાના સંબંધમાં એક વ્યક્તિની ધરપકડ કરવામાં આવી છે. બીજી તરફ પોસ્ટમોર્ટમ બાદ રૂપલના મૃતદેહને છત્તીસગઢની રાજધાની રાયપુર લાવવામાં આવ્યો હતો. શહેરના ન્યૂ રાજેન્દ્રનગર સ્થિત ઘરેથી મૃતકની અંતિમયાત્રા કાઢવામાં આવી હતી. આ દરમિયાન રૂપલના માતા-પિતા અને ભાઈ-બહેન સહિત હજારો લોકો રડી પડ્યા હતા. છત્તીસગઢની રાજધાની રાયપુરના ન્યૂ રાજેન્દ્રનગર વિસ્તારમાં રહેતી ચંદ્રિકા ઓગરે નિવૃત્ત સિવિલ એન્જિનિયર છે. તેમને 3 પુત્રી અને એક પુત્ર છે. સૌથી નાની દીકરી રૂપલ ઓગરે તાજેતરમાં જ એર હોસ્ટેસની ટ્રેનિંગ લેવા મુંબઈ ગઈ હતી. જેની મુંબઈમાં એક દિવસ પહેલા ગળું કાપીને હત્યા કરવામાં આવી હતી.

રૂપલનું શિક્ષણ રાયપુરથી જ પૂરું થયું હતું. 12મા ધોરણ સુધી કેપીએસ સ્કૂલ, રાયપુરમાં અભ્યાસ કર્યો. આ પછી ઉચ્ચ શિક્ષણ ચંદીગઢથી કર્યું. પરિવારજનોએ જણાવ્યું કે રૂપલ ખૂબ જ શાંત હતી. તે તેના મિત્રો સાથે ફરતી હતી અને તેના પરિવારની પ્રિય પણ હતી. ઉલ્લેખનીય છે કે રૂપલ રવિવારે મોડી રાત્રે અંધેરીના મરોલ વિસ્તારમાં કૃષ્ણલાલ મારવાહ માર્ગ પર એનજી કોમ્પ્લેક્સના એક ફ્લેટમાં મૃત હાલતમાં મળી આવી હતી. માહિતી મળ્યા બાદ પવઇ પોલીસની ટીમ રવિવારે રાત્રે લગભગ 9.45 કલાકે ઘટના સ્થળે પહોંચી હતી.

પવઈ પોલીસ સ્ટેશનના એક અધિકારીએ જણાવ્યું કે રૂપલ તેની બહેન અને તેના બોયફ્રેન્ડ સાથે ફ્લેટમાં રહેતી હતી. બંને શહેરની બહાર ગયા હતા અને ફલેટમાં માત્ર રૂપલ જ હતી. જ્યારે રૂપલે તેના પરિવારના સભ્યોના ફોન કોલ્સનો જવાબ આપ્યો ન હતો, ત્યારે તેઓએ મુંબઈમાં તેના સ્થાનિક મિત્રોનો સંપર્ક કર્યો અને તેમને ફ્લેટ પર જવા કહ્યું. જ્યારે મિત્રો ત્યાં પહોંચ્યા તો તેમને ફ્લેટ અંદરથી તાળું મારેલું જોવા મળ્યું અને કોઈએ બેલનો જવાબ પણ આપ્યો નહીં. બાદમાં તેણે સ્થાનિક પવઇ પોલીસ સ્ટેશનનો સંપર્ક કર્યો, જેની મદદથી બીજી ચાવીનો ઉપયોગ કરીને ફ્લેટ ખોલવામાં આવ્યો. તેણે જણાવ્યું કે રૂપલનું ગળું કાપવામાં આવ્યું હતું અને તે જમીન પર લોહી લુહાણ સ્થિતિમાં પડી હતી.

મૃતદેહને પોસ્ટમોર્ટમ માટે રાજાવાડી હોસ્પિટલમાં મોકલવામાં આવ્યો હતો. પોલીસે હત્યાનો ગુનો નોંધી શંકાસ્પદ વ્યક્તિની ધરપકડ કરી છે. આ મામલાની તપાસ માટે 8 ટીમો બનાવવામાં આવી છે. થોડા કલાકોમાં, ટેક-ઇન્ટેલ અને પરંપરાગત પદ્ધતિઓનો ઉપયોગ કરીને, તપાસકર્તાઓએ એક શંકાસ્પદને શોધી કાઢ્યો, જેની ઓળખ હજુ સુધી જાહેર કરવામાં આવી નથી. પરંતુ કહેવાય છે કે તે હત્યા સાથે જોડાયેલો હતો અને તેની ધરપકડ કરવામાં આવી હતી. રૂપલ છ મહિના પહેલા એક ખાનગી એરલાઇનમાં ઇન-ફ્લાઇટ ક્રૂ ટ્રેનિંગ કોર્સ માટે મુંબઈ આવી હતી.