નવી દિલ્હીઃ કોરોના વાઈરસના સંક્રમણને રોકવા માટે સરકારે જ્યારથી દેશમાં લોકડાઉન લાગુ કર્યું છે ત્યારથી જ ગરીબ મજૂર પોતાના વતન પરત ફરવા દિવસરાત સંઘર્ષ કરી રહ્યાં છે. કોઇ પગપાળા જ હજારો કિમીની યાત્રા કરી નીકળી ગયા તો કોઇએ તો દેશી જુગાડ લગાવી બાઇકને કાર બનાવી દીધી. આવો જ એક દેશી જુગાડનો વીડિયો હાલ સોશિયલ મીડિયા પર ધૂમ મચાવી રહ્યો છે. આ વીડિયોમાં એક વ્યક્તિએ પોતાના સમગ્ર પરિવારની સાથે ઘરે પહોંચવા માટે જે તરકીબ અપનાવી તે જોઇને તમને તમારી આંખ પર વિશ્વાસ નહીં થાય.

સોશિયલ મીડિયા પર વાયરલ થયેલા આ વીડિયોમાં દેખાઇ રહ્યું છે કે એક વ્યક્તિ પોતાના સમગ્ર પરિવારની સાથે ઘરે પહોંચવા માટે બાઇકમાં ઝૂલો જોડી દીધો. આવું કરવાથી 2 સીટવાળી બાઇકને 4 સીટવાળી જુગાડ ગાડીમાં બદલી નાખી.

વીડિયોમાં દેખાઇ રહ્યું છે કે આ વ્યક્તિએ બાઇક સાથે ઝૂલાને એક સ્ટીયરિંગ વીલની મદદથી જોડી દીધું. એ વ્યક્તિ સ્ટીયરિંગ વીલની મદદથી ઝૂાલને બેલેન્સ કરી હાઇવે પર આગળ વધી રહ્યો છે. આ વીડિયો જોઇને લોકોએ સોશિયલ મીડિયા પર વિવિધ કમેન્ટ કરી હતી.

ઉલ્લેખનીય છે કે આ વીડિયોને મારિયો કંપનીના ચેરમેન હર્ષ મારીવાલાએ પોતાના ટ્વીટર હેન્ડલ પર શેર કર્યો અને લખ્યું કે લગભગ આ મુસાફરી કરવી સુરક્ષિત માધ્યમ નથી પરંતુ આ વ્યક્તિએ 2 સીટની બાઇકને ચાર સીટવાળી કારમાં બદલી દીધી.

આ વ્યક્તિના જુગાડના વખાણ કરી એક ટ્વીટર યૂઝર્સે લખ્યું કે આવા લોકોનો ઉપયોગ દેશની ટેક્નિકને બદલવા માટે કરવો જોઇએ. જોકે, વીડિયોમાં દેખાઇ રહેલા વ્યક્તિની હજુ ઓળખ થઇ નથી અને આ વીડિયો ક્યારનો અને ક્યાંનો છે તે પણ હજુ બહાર આવ્યું નથી.