રાજસ્થાનના અલવરમાં એક મહિલાના મૃતદેહના ટુકડાઓ જુદા જુદા સ્થળોએ મળી આવતા જિલ્લામાં હલચલ મચી ગઈ હતી. પોલીસે આ બ્લાઈન્ડ મર્ડર કેસની સઘન તપાસ કરી ત્યારે તેનો પતિ ખૂની હોવાનું બહાર આવ્યું. આ હત્યા પાછળનું કારણ અનૈતિક સંબંધો હોવાની શંકા હતી.
અલવર જિલ્લાની ભિવાડી પોલીસે એક મહિલાની હત્યા કર્યા બાદ લાશના ટુકડા-ટુકડા કરી, જુદી જુદી જગ્યાએ ફેંકવાનાં મામલાના બ્લાઈન્ડ મર્ડરનો ખુલાસો કર્યો છે. મહિલાની હત્યા તેના પતિ દ્વારા અનૈતિક સંબંધોની શંકાના આધારે કરવામાં આવી હતી. પોલીસે મૃતક કોમલ ગુપ્તાના પતિ અમિત ગુપ્તાની ધરપકડ કરી છે.
પહેલાં પણ કરી હતી એક હત્યા
આરોપીએ ગયા વર્ષે કોમલ સાથે બીજા લગ્ન કર્યા હતા. આરોપીએ અગાઉ 2013માં મહિલા હોમગાર્ડ મિત્રના બળાત્કાર બાદ તેની હત્યા કરી હતી. હત્યા કેસમાં તેને આજીવન કેદની સજા ફટકારવામાં આવી છે પરંતુ હાલમાં તે હાઈકોર્ટના આદેશથી જામીન પર છૂટ્યો હતો. હકીકતમાં, ભિવાડી શહેરમાં 14 ઓગસ્ટ, 2020 ના રોજ એક મહિલાના શરીરનો હાથ અને પગના અલગ ટુકડા મળી આવ્યા હતા. આ કેસની તપાસમાં પોલીસે મોટો ખુલાસો કર્યો છે.
પોલીસે ખુલાસો કર્યો છે કે મૃતક મહિલાની ઓળખ કોમલ ગુપ્તા તરીકે થઈ છે, જેની હત્યા તેના પતિ અમિત ગુપ્તા નિવાસી ભરતપુર દ્વારા કરવામાં આવી હતી. આ હત્યા પત્ની કોમલના પૂર્વ પતિના ભાણિયા સાથે અનૈતિક સંબંધની શંકાના આધારે કરવામાં આવી હતી.
કોમલે પહેલાં પતિથી છૂટાછેડા લીધા હતા
મૃતક કોમલ ગુપ્તા તેના પતિ અમિત ગુપ્તા સાથે ભીવાડીની એક ફેક્ટરીમાં કામ કરતી હતી અને સાંથલકા ગામમાં ભાડે મકાનમાં રહેતા હતા. અમિત ગુપ્તાએ ડિસેમ્બર 2019 માં ઉત્તર પ્રદેશના કાનપુરમાં રહેતી કોમલ ગુપ્તા સાથે લગ્ન કર્યા હતા. કોમલ ગુપ્તાએ તેના પૂર્વ પતિથી છૂટાછેડા લીધા હતા. કોમલ સાથેના લગ્ન પછી, અમિત ગુપ્તા ભરતપુરમાં ઈમિત્રની દુકાન ચલાવતા હતા, પરંતુ કોરોનાને કારણે, ઈમિત્રની દુકાન બંધ થઈ ગઈ હતી. ત્યારબાદ અમિતે માર્ચ-એપ્રિલ 2020 માં ભરતપુર છોડીને અલવર જિલ્લાના ભિવાડીમાં સ્થળાંતર કર્યું અને બંને સાંથલકામાં ભાડાના મકાનમાં રહેવા લાગ્યા.
આ વાતને લઈને બંને વચ્ચે થયો હતો ઝઘડો
અમિત ગુપ્તા પોતે ભિવાડીની સેન્ટ ગોબેન કંપનીમાં નોકરી કરતો હતો જ્યારે તેની પત્ની ક્લચ વાયર કંપનીમાં નોકરી કરતી હતી. તે દરમિયાન કોમલ ગુપ્તા તેના પૂર્વ પતિ સંજયના ભાણિયા લાલી ગુપ્તા સાથે ફોન પર વાત કરતી હતી. આ વાતને લઈને તેમની વચ્ચે ઝઘડો થયો હતો. 11 ઓગસ્ટ, 2020 ના રોજ કોમલે અમિતને રૂમના દરવાજાની બહાર કાઢી મૂક્યો હતો, ત્યારબાદ તેની પત્ની કોમલના ચરિત્ર અંગેની શંકા વધારે તીવ્ર બની હતી.
પત્ની પર ગેરકાયદેસર સંબંધોની શંકાને કારણે અમિતે પત્ની કોમલને 12 ઓગસ્ટ, 2020 ની રાતે ભાંગની ગોળી જબરદસ્તી ખવડાવીને બેભાન કરી દીધી હતી. અને ત્યારબાદ તેનાં હાથ-પગ બાંધીને ગળું દબાવીને હત્યા કરી દીધી. પછી, મોટા ચાકૂ વડે શરીરના ટુકડા કરી ભિવાડીના સુમસામ સ્થળે જુદી જુદી જગ્યાએ ફેંકી દીધા હતા. આ પછી આરોપી સ્થળ પરથી ફરાર થઈ ગયો હતો.
અગાઉ દોઢ વર્ષ રહ્યો હતો જેલમાં
પોલીસ પૂછપરછમાં સામે આવ્યું છે કે, આરોપી અમિત ગુપ્તાએ ભરતપુરમાં 2013માં તેની મહિલા હોમગાર્ડ મિત્રને ઘરે બોલાવી તેની સાથે બળાત્કાર ગુજાર્યો હતો અને બાદમાં તેની હત્યા કરી હતી. આ અંગે ભરતપુરના કોતવાલી પોલીસ સ્ટેશનમાં કેસ નોંધવામાં આવ્યો હતો અને આ કેસમાં આરોપી અમિત ગુપ્તાને કોર્ટે આજીવન કેદની સજા ફટકારી હતી. આરોપી આશરે દોઢ વર્ષથી ભરતપુરની સેવર જેલમાં હતો, પરંતુ મે 2014 થી રાજસ્થાન હાઇકોર્ટના આદેશ પર જામીન પર હતો.
આ રીતે પકડાયો હત્યારો
ભિવાડી પોલીસ અધિક્ષક રામમૂર્તિ જોશીએ જણાવ્યું હતું કે, 14 ઓગસ્ટે ભિવાડીમાં મહિલાના ટુકડાઓ જુદી જુદી જગ્યાએ મળી આવ્યા હતા, જે મહિલાના શરીરની ઓળખ કરી શક્યા ન હતા, પરંતુ પોલીસે આ બ્લાઈન્ડ હત્યાને ખોલવા માટે અથાગ મહેનત કરી છે. ભીવાડી શહેરમાં પોલીસ દ્વારા ડોર-ટુ-ડોર સર્વે કરવામાં આવ્યો હતો અને કર્મચારીઓ અને ભાડુઆતના રેકોર્ડની તપાસ કરવામાં આવી હતી. ભિવાડી વિસ્તારમાં દોઢ મહિનામાં ઘર ખાલી કરાવનારા અથવા નોકરી છોડી દેનારાઓ વિશે માહિતી એકત્રિત કરવામાં આવી હતી.
આ પછી પોલીસને જાણકારી મળી હતી કે, ભિવાડીના સાંથલકા ગામે ભાડાના મકાનમાં રહેતા અમિત ગુપ્તા અને કોમલ ગુપ્તા અચાનક ઓરડામાંથી ગાયબ થઈ ગયા, જેની કોઈ માહિતી મળી શકી નથી. આરોપી દ્વારા તેનો મોબાઇલ ફોનનો ઉપયોગ કરવામાં આવતો ન હતો. આ પછી પોલીસે આ કેસની તપાસ શંકાસ્પદ ગણાવી હતી અને પોલીસના અથાગ પ્રયત્નો બાદ અમિત ગુપ્તાની ધરપકડ કરવામાં આવી હતી. અમિતે તેની પત્નીની હત્યાની કબૂલાત કરી હતી.