બ્રિટનનાં મેડિકલ વૈજ્ઞાનિકોએ કોરોના વાયરસનાં નવા લક્ષણોની જાણકારી આપી છે, અને અપીલ કરી છેકે, નેશનલ હેલ્થ સર્વિસ તેને કોરોનાના સત્તાવાર લક્ષણોની યાદીમાં સામેલ કરે, વૈજ્ઞાનિકોનું કહેવું છેકે, Skin Rashes કોરોનાનું એક લક્ષણ હોઈ શકે છે. વૈજ્ઞાનિકોએ કોરોનાનાં નવા લક્ષણને લઈને અભ્યાસ કર્યો હતો અને દરેક 11માંથી એક કોરાનાં પેશન્ટમાં સ્કીન પર રેશિઝ દેખાયા હતા. સંશોધનનાં પ્રમુખ ડોક્ટર મારિયો ફાલ્ચી કહે છેકે, કોરોનાનાં દર્દીઓમાં ઘણા સપ્તાહ સુધી રેશિઝની સમસ્યા રહે છે.
કિંગ્સ કોલેજ લંડનના વૈજ્ઞાનિકોએ 20 હજાર લોકોનો અભ્યાસ કર્યો. તેમાં એ લોકો શામેલ હતા, જેમનામાં કોરોનાની પુષ્ટિ થઈ હતી અથવા કોરોના ચેપ અંગે ખૂબ જ શંકાસ્પદ હોવાનું માનવામાં આવતું હતું.
અભ્યાસ દરમિયાન જાણવા મળ્યું કે બ્રિટનમાં કોરોનાથી સંક્રમિત 9 ટકા લોકોમાં ત્વચા પર ફોલ્લીઓ જોવા મળી હતી. જ્યારે 8 ટકા લોકોમાં કોરોનાના અન્ય લક્ષણોની સાથે ત્વચા પર ફોલ્લીઓ પણ જોવા મળી હતી.
હાલમાં, બ્રિટનની રાષ્ટ્રીય આરોગ્ય સેવાની સત્તાવાર સૂચિમાં કોરોનાનાં ફક્ત ત્રણ લક્ષણો છે. તાવ, સતત કફ અને ગંધ અને સ્વાદનો અભાવ. જ્યારે, ભારતના આરોગ્ય અને પરિવાર કલ્યાણ મંત્રાલયની વેબસાઇટ પર, તાવ, થાક અને સૂકા કફ વિશેની માહિતી કોરોનાના સામાન્ય લક્ષણો છે.
આ સાથે, કેટલાક દર્દીઓમાં શ્વાસની તકલીફ, શરીરના દુખાવા, નાક જામી જવુ, વહેતું નાક, ગળામાં દુખાવો અને ઝાડા-ઉલટીના લક્ષણો હોવાનું જાણવા મળ્યું છે.
જ્યારે, WHOના મુખ્ય લક્ષણોમાં તાવ, સૂકો કફ અને થાકની લાગણી શામેલ છે. અન્ય લક્ષણોમાં શરીરના દુખાવા, નાક જામી જવું, માથાનો દુખાવો, કન્ઝક્ટિવાઈટિસ, ગળામાં દુખાવો, ઝાડા, ગંધ અને સ્વાદની ઓળખની અછત, ત્વચા પર ફોલ્લીઓ, આંગળીઓનો રંગ બદલવાનો સમાવેશ થાય છે.