મુંબઈઃ તાજેતરમાં મુંબઈ ક્રાઇમ બ્રાન્ચ યુનિટે સહાર ગામમાં પેકેટનાં દૂધમાં ભેળસેળ કરતી એક ગેંગને પકડી હતી. સાથે-સાથે બે લોકોની ધરપકડ પણ કરી હતી. આ લોકો જાણીતી કંપનીઓના પેકેટવાળા દૂધમાંથી શુદ્ધ દૂધ કાઢી તેમાં ભેળસેળવાળું દૂધ મિક્સ કરતા હતા.
આ દૂધને હોટેલ્સ, રેસ્ટોરેન્ટ્સ અને ચાની કીટલીઓ પર સપ્લાય કરતા હતા. તેમની પાસેથી બે બ્રાન્ડેડ કંપનીઓનું 271 લીટર ભેળસેળવાળું દૂધ જપ્ત કરવામાં આવ્યું છે.
આ સમગ્ર કેસની તપાસ કરી રહેલા ડીસીપી અકબર પઠાણે જણાવ્યું કે, અંધેરી પૂર્વના સહાર ગામમાં બે ઘરોમાં રેડ પાડીને બે લોકોની ધરપકડ કરવામાં આવી છે. આ ભેળસેળવાળા દૂધની કિંમત લગગભ દસ હજારની આસપાસ છે. આ લોકો પાસેથી મોટી માત્રામાં રંગ, કેમિકલ અને ચૂનો પણ મળી આવ્યો છે.
તપાસમાં એ પણ જાણવા મળ્યું છે કે, તેમના દ્વારા તૈયાર કરવામાં આવતું દૂધ ઝેરી હોતું હતું. પોલીસને આશંકા છે કે, તેમની આ ગેંગમાં બીજા પણ ઘણા લોકો હોઇ શકે છે. જેમાં હોટેલ કે રેસ્ટોરેન્ટ્સના કેટલાક કર્મચારીઓ પણ હોઇ શકે છે.