મુંબઈ: માર્કેટ કેપની દ્રષ્ટિએ દેશમની સૌથી મોટી કંપની રિલાયન્સ ઈન્ડસ્ટ્રીઝ અને તેના ચેરમેન મુકેશ અંબાણી માટે સતત સારા સમાચાર આવી રહ્યા છે. થોડા દિવસો પહેલાં રિલાયન્સ ઈન્ડસ્ટ્રીઝને દુનિયાની સૌથી મોટી બ્રાંડ જાહેર કરવામાં આવી હતી. તો હવે મુકેશ અંબાણી દુનિયાનાં ચોથા નંબરનાં સૌથી પૈસાદાર વ્યક્તિ બની ગયા છે.
80.6 અબજ ડોલરની સંપત્તિ
બ્લૂમબર્ગ બિલિયોનેર ઈન્ડેક્સના રીઅલ-ટાઇમ નેટવર્થ મુજબ,મુકેશ અંબાણી 80.6 અબજ ડૉલર (લગભગ 6.03 લાખ કરોડ રૂપિયા) ની સંપત્તિ સાથે ચોથા સ્થાને છે. સંપત્તિની વાત કરીએ તો, મુકેશ અંબાણી હવે ફેસબુકના સ્થાપક માર્ક ઝુકરબર્ગ ($ 102 અબજ) ની નજીક આવી ગયા છે. જો કે, હજી પણ બંનેની સંપત્તિમાં નોંધપાત્ર તફાવત છે.
મુકેશ અંબાણીથી આગળ કોણ-કોણ
ફેસબુકના સ્થાપક મુકેશ અંબાણી કરતા આગળ માર્ક ઝુકરબર્ગ છે. માર્ક હાલમાં ત્રીજા ધનિક વ્યક્તિ છે. જ્યારે, માઇક્રોસોફ્ટના સહ-સ્થાપક બિલ ગેટ્સ બીજા સ્થાને છે, જ્યારે એમેઝોનના સીઈઓ જેફ બેઝોસ પ્રથમ સ્થાને છે.
તાજા રેન્કિંગમાં, મુકેશ અંબાણીએ એલવીએમએચના બર્નાર્ડ આર્નોલ્ડ એન્ડ ફેમિલીને પાછળ છોડી દીધા છે. બર્નાર્ડ આર્નોલ્ડ પાંચમા ક્રમે છે જ્યારે બર્કશાયર હેથવેના વોરન બફેટ છઠ્ઠા સ્થાને છે.
જણાવી દઈએ કે બ્લૂમબર્ગ બિલિયોનેર ઇન્ડેક્સ અબજોપતિઓની રીઅલ-ટાઇમ સંપત્તિનું મૂલ્યાંકન કરે છે. આ આંકડા કાયમી નથી, વિશ્વભરના શેર બજારના વધઘટને લીધે, બદલાવ થતો રહે છે.
સતત મળી રહી છે સફળતા
મુકેશ અંબાણીની સંપત્તિમાં વધારો થવાનાં ઘણાં કારણો છે. રિલાયન્સ જિઓમાં વૈશ્વિક સ્તરે સતત રોકાણ મળી રહ્યું છે. જ્યારે, રિલાયન્સ ઇન્ડસ્ટ્રીઝની માર્કેટ કેપ પણ સતત વધી રહી છે.
જો કંપનીનો શેરનો ભાવ 2100 રૂપિયાથી વધુ છે, તો માર્કેટ કેપ પણ 14 લાખ કરોડને પાર કરી ગઈ છે. આ સિદ્ધિ હાંસલ કરનારી પહેલી ભારતીય કંપની છે. જણાવી દઇએ કે રિલાયન્સ ઇન્ડસ્ટ્રીઝ પહેલા જ દેવા મુક્ત થઈ ગઈ છે.
