ગાંધીનગર: કમાસમો વરસાદના કારણે ગુજરાતના ખેડૂતોના ભારે નુકશાન થયું હતું જેને ધ્યાનમાં રાખીને ગુજરાત સરકારે 3, 795 કરોડના સહાય પેકેજની જાહેરાત કરી હતી. જાહેરાત કરતાં નીતિન પટેલે જણાવ્યું હતું કે, 20 તારીખ સુધીમાં થયેલા નુકસાનને આવરીને આ પેકેજની જાહેરાત કરાઈ છે. જેમાં ગુજરાતના તમામ જિલ્લાને આવરી લેવાયા છે. ગુજરાતના તમામ 18 હજાર ગામડાઓને 56.36 લાખ ખેડૂતોને આ સહાયનો લાભ મળશે.

1 ઈંચથી વધુ વરસાદ પડ્યો હોય તેવા વિસ્તારોમાં અંદાજે રૂપિયા 2,873 કરોડની સહાય આપવામાં આવશે. 1 ઈંચથી ઓછો વરસાદ પડ્યો હોય તેવા વિસ્તારોમાં અંદાજે રૂપિયા 238 કરોડની સહાય આપવામાં આવશે. છૂટો છવાયો વરસાદ પડ્યો હોય તેવા વિસ્તારમાં અંદાજે રૂપિયા 684 કરોડની સહાય આપવામાં આવશે.

એક ઈંચથી વધુ વરસાદ પડ્યો હોય તેવા ગુજરાતના 9,416 ગામના 28.61 લાખ ખેડૂત ખાતેદારોને વધુમાં વધુ બે હેક્ટરની મર્યાદામાં એસ.ડી.આર.એફના ધોરણ અનુસાર હેક્ટર દીઠ 6,800 રૂપિયાની સહાય ચૂકવવામાં આવશે.

ગુજરાતમાં જ્યાં એક ઇંચથી ઓછો વરસાદ થયો હોય પરંતુ કૃષિ વિભાગના ક્લસ્ટરમાં મુકાયેલા ઓટોમેટિક વેધર સ્ટેશનના આંકડામાં એક ઈંચથી વધુ વરસાદ હોય તેવા 1,676 ગામના 4.70 લાખ ખેડૂતોને હેક્ટર દીઠ 6,800 રૂપિયા (વધુમાં વધુ બે હેક્ટરની મર્યાદા) સહાય ચૂકવવામાં આવશે.

એક ઈંચથી ઓછો વરસાદ નોંધાયો હોય તેવા 1,676 ગામના 5.95 લાખ ખેડૂત ખાતેદારોને હેક્ટર દીઠ 4 હજાર રૂપિયા (વધુમાં વધુ બે હેક્ટરની મર્યાદા) સહાય ચૂકવવામાં આવશે. છૂટો છવાયો વરસાદ પડ્યો હોય તેવા 5,814 ગામના 17.10 લાખ ખેડૂતોને હેક્ટર દીઠ 4 હજાર રૂપિયા(વધુમાં વધુ બે હેક્ટરની મર્યાદા) સહાય ચૂકવવામાં આવશે તેવું ગુજરાત સરકારે જાહેરાતમાં કીધું છે.